Virani Ke Baadal Chhane Lag Gae Hain

virani ke badal chhane lag gae hain

panchhi ab us gaanv se jaane lag gae hain

us ko jab se dekha mujh ko hosh nahin

yaaro mere hosh Thikane lag gae hain

shahr se aae majnun ne ik baat kahi

aur divane ḳhaak uḌane lag gae hain

saaqi tere ek ishara karne par

mai-kash bhi azaan sunane lag gae hain

ham ne ab ik aur mohabbat kar li hai

ankhon ko phir ḳhvab dikhane lag gae hain

is shahr-e-be-zauq men kis ka pair paḌa

peḌ parinde sher sunane lag gae hain

Leave a Comment