Shahid Kamal
phir aaj dard se raushan hua hai sina-e-ḳhvab
saja hua hai mire zaḳhm se madina-e-ḳhvab
ḳhizan ki fasl men jo rizq-e-vahshat-e-shab tha
luTa raha huun sar-e-shab vahi ḳhazina-e-ḳhvab
musafiran-e-shab-e-gham tumhari ḳhair to hai
taḌaḳh ke TuuT gaya kyuun mira nagina-e-ḳhvab
haqiqaton ke bhanvar se koi nikale phir
ravan kare miri janib koi safina-e-ḳhvab
bana diya tiri sohbat ne be-adab in ko
koi sikha.e in ankhon ko ab qarina-e-ḳhvab
koi to ho ki jo mujh ko fareb-e-paiham de
vo koi husn-e-haqiqat ho ya hasina-e-ḳhvab
ye aankh hai hama-dam gardish-e-tajassus men
talash karti hai mujh men koi dafina-e-ḳhvab
fishar-e-nim-shabi se ab in dinon ‘shahid’
hai chaak chaak miri jaan qaba-e-sina-e-ḳhvab
Leave a Reply