Tashna Azmi
hamen haara nahin samjho ki ham dil-gir aa.e hain
kamanen thiin kahin par aur kahin se tiir aa.e hain
nazar bhar dekh lo ham aaj takmil-e-tamanna men
tumhare ru-ba-ru pahne hue zanjir aa.e hain
ye sar hazir hai mera gar salamat aap rah jaa.en
vagarna muft hathon men liye shamshir aa.e hain
ilahi de hamen nusrat ki ham tere bharose par
zaban par aaj rakh kar nara-e-takbir aa.e hain
jahan par aag barsa.i thi tum ne asmanon se
usi basti men ham kar ke na.i ta.amir aa.e hain
siyahi dil ki miT ja.egi qibla dekh liije ham
labon par muskurahaT ki liye jagir aa.e hain
har ik lahja savali hai abhi tak bazm men ‘tashna’
guman hota hai jaise lucknow men ‘mir’ aa.e hain
Leave a Reply