koi mujh se ḳhafa hai is liye ḳhud se ḳhafa huun
ubalte khaulte mausam ke neze par rakha huun
mire andar mira kuchh bhi nahin bas tu hai baaqi
tire andar bata pyare main ab kitna bacha huun
miri sanson ki ḳhamoshi men kaisa shor kyuun main
ka.i sadiyan guzar jaane pe bhi ḳhud se ḳhafa huun
kulhaḌi ka mujhe ab Dar nahin aadat hai us ki
ga.e vo din main kahta tha koi jangal ghana huun
milun ḳhud se main kyuun fursat nahin mujh ko tumhin se
main ḳhud men ho ke bhi bas tum men rahne ki raza huun
sharafat ko miri, kamzoriyan maana sabhi ne
main ḳhvab-e-amn bunta tha lahu men san gaya huun
mujhe mujh tak pahunchne men lagenge janm kitne
zamin se TuuT kar chhiTka jazira ho gaya huun
yahi qismat hai un ke ḳhvab se rahna nadarat
main jaaga huun, main jin ki niind men takiya bana huun
bulate hain mujhe jazbat, ehsasat mere
mujhe tapna hai main ‘navnit’ hone ki saza huun
Leave a Reply