Asrarul Haq Asrar
jante the gham tira dariya bhi tha gahra bhi tha
Dubne se peshtar socha bhi tha samjha bhi tha
aa.ina ai kaash tu apna bana leta mujhe
fa.eda is men bahut tera bhi tha mera bhi tha
ik azab-e-jan thi us ki tunak-ḳhui magar
za.iqa us dard ka miTha bhi tha tikha bhi tha
kaise paḌh leta main us chehre se apna hal-e-dil
vo ruḳh-e-jugnu-sifat jalta bhi tha bujhta bhi tha
yuun kiya hai muddaton main ne ghazal ka mashghala
ek tere naam ko likhta bhi tha paḌhta bhi tha
dil ki rahon men ba-har-surat rahi ik raushni
chand tere dard ka baḌhta bhi tha ghaTta bhi tha
ham ne tere aks ko taqsim kab hone diya
aa.ina to barha TuuTa bhi tha bikhra bhi tha
jab vo ruḳhsat ho ga.e ham se to yaad aaya hamen
un se ai ‘asrar’ kuchh kahna bhi tha sunna bhi tha
Leave a Reply