Ahmad Zafar
jangal ka sannata mera dushman hai
phailta sahra dida-o-dil ka dushman hai
jism ki ot men ghaat lagae baitha hai
mausam-e-gul bhi ek anokha dushman hai
naqsh-e-vafa men rang vahi hai dekho to
jis ki duniya jo duniya ka dushman hai
sahil-e-marg pe rafta rafta le aaya
tanhai ka rog bhi achchha dushman hai
chand men shayad pyaar milega insan ko
is basti ka saaya saaya dushman hai
patthar to khamosh pade hain rahon men
aina kyuun aine ka dushman hai
jis ko dushman samjha vo to chhod gaya
jis ko apna jaana gahra dushman hai
Leave a Reply