Siya Sachdev
dekhta kya hai tu hairat se hamara chehra
ham ne muddat se sajaya na sanvara chehra
ye to achchha hai ki be-rang hai aansu varna
kis qadar daagh liye phirta hamara chehra
roz hota hai guzar ek na.i andhi se
aur aT jaata hai phir dhuul se saara chehra
zindagi ek hi chehre pe guzari ham ne
ham ne pahna na kabhi ham ne utara chehra
daagh lag jaa.e agar koi bhi peshani par
aa.ina bhi nahin karta hai gavara chehra
Leave a Reply