Hakeem Manzoor
TuuT kar bikhre na suraj bhi hai mujh ko Dar bahut
habs andar se ziyada aaj hai bahar bahut
mujh ko bhi aata hai fan sahib-navazi ka magar
kya karun meri ana mujh se bhi hai ḳhud-sar bahut
gham-zada karti hai mujh ko bas darun-bini miri
yuun to main bhi dekhta huun ḳhushnuma manzar bahut
apni ankhen ghar pe rakh kar bhi tamasha.i hain log
aur un ki is ada par ḳhush hain bazigar bahut
ab tarasha hi nahin jaata kabhi paikar koi
aaj bhi aazar bahut hain aaj bhi patthar bahut
main kisi ki be-ghari ka kis liye matam karun
zindagi ḳhud aaj lagti hai mujhe be-ghar bahut
gul-parasti par na kar israr ai ‘manzur’ tu
dekh har ik moḌ par hain shahr men patthar bahut
Leave a Reply