dil men vo shor na ankhon men vo nam rahta hai
ab tap-e-hijr tavaqqo se bhi kam rahta hai
kabhi shoale se lapakte the mire siine men
ab kisi vaqt dhuan sa koi dam rahta hai
kya khuda jaane mire dil ko hua tere baad
na khushi is men thaharti hai na gham rahta hai
rishta-e-tar-e-tamanna nahin tuuta ab tak
ab bhi ankhon men tiri zulf ka kham rahta hai
chhod jaati hai har ik rut koi khushbu koi rang
na sitam rahta hai baaqi na karam rahta hai
Leave a Reply