Jahanzeb Sahir
luTne valon ka madad-gar nahin hai koi
is qabile ka bhi sardar nahin hai koi
main vo mahrum-e-tamanna huun ki jis ki ḳhatir
bhari basti men azadar nahin hai koi
shah-zadi tiri ankhon men ye dahshat kaisi
phuul hain haath men talvar nahin hai koi
dil kisi vaqt kisi par bhi fida ho jaa.e
ye vo kashti hai ki patvar nahin hai koi
aankh men ashk nahin hain to yahi lagta hai
ik sitara bhi numudar nahin hai koi
mujh ko is baat se aata hai bahut ḳhauf yahan
sab farishte hain gunahgar nahin hai koi
dekh ye zaḳhm tarashe hue lagte hain tujhe
tu samajhta hai mira yaar nahin hai koi
ik ḳhala aur bahut gahra ḳhala hai ‘sahir’
dekh aaya huun main us paar nahin hai koi
Leave a Reply