tu ne kamal kaam ye nadan kar diya
ghar men mujhe ḳhud apna hi mehman kar diya
bas ik zara si bhuul hui iḳhtilaf ki
be-daḳhl kar ke taḳht se darban kar diya
ai bad-nasib mera yaqin mujh se chhin kar
tujh ko ye zo.am hai mira nuqsan kar diya
buzdil tha main jo kar na saka ḳhud ye intizam
sad-shukr tum ne maut ka saman kar diya
haa.e laga ke aag charaghan ke shauq men
hakim ne saare shahr ko viran kar diya
qad se mira saval baḌa tha so is liye
mohsin ko apne daḳhil-e-zindan kar diya
ḳhairat de ke guzra hai jo mere paas se
us ne kabhi mujhe bhi tha bhagvan kar diya
yuun to main mohtasib raha apna tamam umr
tum ne magar bata ke ye hairan kar diya
‘safdar’ qunutiyat ka ye e.azaz jo mila
e.azaz dene vaale ne ehsan kar diya
Leave a Reply