ek ma.asum tamanna ki faza thi kal tak
zindagi aisi kahan hosh-ruba thi kal tak
ghaiz andhi ka bana ab hai muqaddar mera
dil ke angan men mahakti si saba thi kal tak
naghmagi aa ga.i kis taur se us ke lab par
jis ki avaz tarannum se juda thi kal tak
aaj ḳhamosh bahut bazm-e-baharan kyuun hai
gungunate se libade men hava thi kal tak
husn ki shoḳh-nazar mange hai qimat apni
jhukti ankhon ke dariche men haya thi kal tak
ye jo hangamon se marbut hai mahfil meri
kaif-za dil-ruba bulbul ki sada thi kal tak
sar-nigun vaqt ke qadmon men hai ḳhvahish apni
varna har saans men ik mauj-e-ana thi kal tak
ab kahan shauq ko milta hai baḌhava ‘ja.afar’
narm palkon men ghuli ek ada thi kal tak
Leave a Reply