khuda-parast hue ham na but-parast hue
kisi taraf na jhuka sar kuchh aise mast hue
jinhen ghurur bahut tha namaz roze par
gae jo qabr men saare vuzu shikast hue
hamare dil men jo vahshat ne aag bhadkai
sharar bhi rah gae pichhe ye garm jast hue
jo apne vaade vafa vo kare karam us ka
ki ham se to na vafa vada-e-alast hue
ghurur kar ke nigahon se gir gae maghrur
buland jitne hue utne aur past hue
raha khumar ki sadme se chuur shisha-e-dil
magar na sail-e-mai tere mai-parast hue
lagae khaar lagin tattiyan bhi mehndi ki
ruke na bu-e-chaman laakh band-o-bast hue
khizan men bhi na chhuta daman-e-chaman ham se
hue jo suukh ke kanta to khar-bast hue
bana hai panja-e-qassab dast-e-zulm un ka
sab ungliyan huiin chhuriyan ye tez dast hue
habab se bhi habibon ke dil men nazuk-tar
nazar ke bhi jo lage thes ye shikast hue
tadap dikha na ise ‘bahr’ mahi-e-dil ki
ghazab hua jo vo tar-e-nigah shast hue
Leave a Reply