Arman Najmi
nazar ke samne sahra-e-be-panahi hai
qarib o duur mire baḳht ki siyahi hai
ufuq ke paar kabhi dekhne nahin deti
sharik raah umidon ki kam-nigahi hai
bhara paḌa tha ghar is ka ḳhushi ke siile se
ye kya hua ki vo ab raste ka raahi hai
vo zehan ho to harifon ki chaal bhi sikhen
hamare paas faqat uzr-e-be-gunahi hai
ukhaḌte qadmon ki avaz mujh se kahti hai
shikast hi nahin ye da.imi tabahi hai
adad kamin men hai aage ye kya pata us ko
rah-e-farar men haara hua sipahi hai
Leave a Reply