charagh se kabhi taron se raushni mange
andheri raat bhi kis kis se zindagi mange
jalane vaale jalate hain nafraton ke charagh
faza-e-vaqt mohabbat ki raushni mange
vo na-shanas-e-haqiqat hai is zamana men
vafa ko bhiik samajh kar gali gali mange
nishat-o-ranj muqaddar ki baat hoti hai
kisi se gham na kisi se koi ḳhushi mange
har ek shaḳhs men andaz-e-kaj-ada.i hai
magar ye dil hai ki rah rah ke dosti mange
jahan suron ki haqiqat na ho vahan pe ‘guhar’
jo koi mange to kya taj-e-khusravi mange
Leave a Reply