dasht aise gulshan men gul pe gul khilane ki har ada mubarak ho
nannhe-munhe ghunchon se ḳhud-kushi karane ka mashghala mubarak ho
par-burida bulbul ne jis jagah bhi tinkon se ghonsle bana.e the
vo chaman jalane ko ab bhi tere hathon men sa.iqa mubarak ho
tu ne jin becharon ke kam-sinon ki lashon par pa-e-taḳht rakkhe hain
un ke jism-e-uryan par tere jabr-e-be-ja ka dabdaba mubarak ho
ḳhuun baha chuka ab tak to javan parindon ka chaaT lag chuki tujh ko
ab se shir-ḳhvaron ke taaza ḳhun-e-arzan ka za.iqa mubarak ho
sufiyon buzurgon ne naqsh-e-pa jo chhoḌe the sab miTa diye tu ne
vaqt ke darinde ab kusht-o-ḳhun ka ik ik rasta mubarak ho
jabr-e-mujrimana se tu chaman pe qabiz hai ab bhi tasfiya kar le
varna gulsitan tera kal jahan ke naqshe par sar kaTa mubarak ho
Leave a Reply