Zafar Iqbal
yuun bhi nahin ki sham-o-sahar intizar tha
kahte nahin the munh se magar intizar tha
muddat ke ba.ad phuul ki surat khila tha dil
shabnam ki tarah taza-o-tar intizar tha
balon men dhuul paanv men chhale na the magar
phir bhi kuchh ek ranj-e-safar intizar tha
koi ḳhabar thi us ki parindon ke shor men
rang-e-hava men shaḳh-o-shajar intizar tha
yuun thi javaharat lab-o-chashm ki jhalak
jaise ye koi la.al-o-gohar intizar tha
dalan-o-dar men ek tavaqqo.a thi mauj mauj
divar-o-bam the ki bhanvar intizar tha
aise men e’tibar kisi par na tha mujhe
main bhi tha saath saath jidhar intizar tha
ankhen thiin ḳhushk ḳhushk to dil bhi tha band band
khul hi nahin raha tha kidhar intizar tha
mayus hone vaale na the ham bhi ai ‘zafar’
aaya nahin to bar-e-digar intizar tha
Leave a Reply