hai vahi marka-e-neki-o-shar mere ba.ad
tham na jaa.en kahin yaran-e-safar mere ba.ad
kam hain aise jo karen arz-e-hunar mere ba.ad
aaj ghamnak se hain ahl-e-nazar mere ba.ad
chand saa.at ke liye ruk bhi gaya ro bhi liya
karvan phir bhi hai sargarm-e-safar mere ba.ad
jazb thiin jis men mire ḳhun-e-vafa ki chhinTen
ban gaya sajda-gah-e-ḳhalq vo dar mere ba.ad
hijr ki raat larazta hi raha palkon par
qatra-e-ashk bana najm-e-sahar mere ba.ad
shayad ai dost tamashaon ke hangamon men
yaad aa.e miri mohtat nazar mere ba.ad
aaj anjan bano bhuul bhi jaao lekin
kya karoge miri yaad aa.e agar mere ba.ad
kyuun bichhate ho miri raah men kanTe yaaro
ḳhair jaari se badal ja.ega shar mere ba.ad
ab bhi shor-e-qadam-e-rah-ravan hai to vahi
phir bhi suuni hai tiri rahguzar mere ba.ad
kya koi aur banata tha nasheman apna
phir usi shaḳh pe hai raqs-e-sharar mere ba.ad
ik miri yaad ki mash.al ke siva kuchh bhi na ho
raat is tarah se bhi hogi basar mere ba.ad
ye tamavvuj ye talatum ye shahadat ye shuhud
ḳhatm hai manzil-e-avval ka safar mere ba.ad
ashk ankhon men bhare us ne bhi dekha ‘zaidi’
aaj mahfil ko ba-andaz-e-digar mere ba.ad
Leave a Reply