pur-lutf sukun-baḳhsh hava.en bhi bahut thiin
gulshan men ta.assub ki vaba.en bhi bahut thiin
ḳhud main ne hi rakkha na ḳhayal apna kabhi bhi
ghairon ki kuchh apnon ki jafa.en bhi bahut thiin
surat pe ujale the agar shams-o-qamar ke
zulfon ki siyahi men ghaTa.en bhi bahut thiin
thi ahd-e-javani men mohabbat hi mohabbat
na-karda gunahon ki saza.en bhi bahut thiin
mab.hut the mas.hur the sab dekh ke us ko
shaffaf sarapa tha ada.en bhi bahut thiin
har vaqt mire saath the asbab-e-tabahi
qismat thi ḳharab apni ḳhata.en bhi bahut thiin
ik roz qaza le ga.i bimar ko ‘azam’
the jab ki masiha bhi dava.en bhi bahut thiin
Leave a Reply