vahm tha ya guman jaisa tha
dil ke vo mehman jaisa tha
tiir kajal ke us ki ankhon men
aur abru kaman jaisa tha
phuul se tan pe us ke raushan ḳhat
manzilon ke nishan jaisa tha
umr bhar kaun yaan Thaharta hai
main to ik sa.eban jaisa tha
jaan lo bas ki ulfaton ka safar
ik ḳhayali uḌaan jaisa tha
ab yahan vasvason ke Dere hain
dil ki pahle makan jaisa tha
ye main kyon aaj be-rida huun bahut
mujh pe kuchh asman jaisa tha
Leave a Reply