Saleem Raza Rewa
jab se un ki mehrbani ho ga.i
zindagi ab rat-rani ho ga.i
us ne manga zindagi saughat men
naam us ke zindagani ho ga.i
ibtida-e-zindagi ki sub.h se
shaam tak puuri kahani ho ga.i
ruThna hansna manana pyaar men
zindagi kitni suhani ho ga.i
kho ga.e masrufiyat ki bhiiḌ men
ḳhatm is men zindagani ho ga.i
main bhi un ka huun divana is tarah
jis tarah ‘mira’ divani ho ga.i
us ne manga zindagi saughat men
naam us ke zindagani ho ga.i
na-ḳhuda jab zindagi ka vo ‘raza’
paar apni zindagani ho ga.i
Leave a Reply