Hasan Shahnawaz Zaidi
vo dekh kar na ruka aur guzar ga.e ham bhi
dua-e-shab ki tarah be-asar ga.e ham bhi
sama.aton ke jazire talak rasa.i na thi
vo be-ḳhabar hi raha be-samar ga.e ham bhi
yahi kahenge ki ik ḳhauf tha bulandi ka
kisi ke bam-e-nazar se utar ga.e ham bhi
mila vo zor-e-tasavvur subuk-irada hue
musibat aane se pahle hi Dar ga.e ham bhi
shanavari pe kahin harf hi na aa jaa.e
agar tarash ke dariya guzar ga.e ham bhi
ḳhuda bhi to kabhi yaksaniyat se ukta.e
kamal kaun sa hoga jo mar ga.e ham bhi
sada-e-ḳhvab to the aise chuur chuur hue
ghubar ban ke faza men bikhar ga.e ham bhi
Leave a Reply