Mujhe Dar Hai Hanste Hanste Kahin Ro Na De Zamana

mujhe Dar hai hanste hanste kahin ro na de zamana

jo badal badal ke unvan main kahun vahi fasana

ye bahar ye ghaTa.en ye shabab ka zamana

mujhe ab to diije naseh na salah-e-muḳhlisana

jo ho jazb jazb-e-kamil jo ho shauq-e-valihana

to hai bandagi ko lazim na jabin na astana

hai mujhe malal is ka ki badal ga.iin vo nazren

mujhe is ka gham nahin hai ki badal gaya zamana

main kab aaya ja.unga kab mujhe kuchh ḳhabar nahin hai

miri ibtida fasana miri intiha fasana

mira haal dekhte hi ki har ik ne mai se tauba

miri laghzishon ke sadqe men sambhal gaya zamana

sar-e-tur kyon main ja.un bhala us ke dekhne ko

vo har ek ja ayaan hai jo nazar ho arifana

kabhi saath saath chalna na hua nasib mujh ko

kabhi baḌh gaya main aage kabhi baḌh gaya zamana

are aap ki to ankhon men jhalak rahe hain aansu

bas ab aap sun chuke aur main suna chuka fasana

miri har ghazal men pinhan miri dil ki dhaḌkanen hain

magar ai ‘sa.id’ us ko na samajh saka zamana