Zaheer Kashmiri
firaq-e-yar ke lamhe guzar hi ja.enge
chaḌhe hue hain jo dariya utar hi ja.enge
tamam raat dar-e-mai-kada pe kaaTi hai
sahar qarib hai ab apne ghar hi ja.enge
tu mere hal-e-pareshan ka kuchh ḳhayal na kar
jo zaḳhm tu ne laga.e hain bhar hi ja.enge
miyan-dar-o-shabistan-e-yar baiThe hain
jidhar ishara-e-dil ho udhar hi ja.enge
julus-e-naz kabhi to idhar se guzrega
kabhi to dil ke muqaddar sanvar hi ja.enge
yahi rahega jo andaza-e-na-shanasa.i
tumhare chahne vaale to mar hi ja.enge
abhi chhiḌi bhi na thi dastan-e-ahd-e-vafa
kise ḳhabar thi ki vo yuun mukar hi ja.enge
jamal-e-yar ki nadida ḳhalvaton men ‘zahir’
agar ga.e to ye ashufta-sar hi ja.enge
Leave a Reply