Mujhe Zindagi Ne Diya Kuchh Nahin

Farasat Rizwi

mujhe zindagi ne diya kuchh nahin

magar mujh ko us ka gila kuchh nahin

ḳhayalon ke ḳhanjar bahut tez hain

vahi ḳhush hai jo sochta kuchh nahin

bahut ḳhub-ru tha mira ham-suḳhan

use dekhne men suna kuchh nahin

bas ik pal ki divar hai darmiyan

adam se mira fasla kuchh nahin

vo gul nazr-e-ḳhak-e-ḳhizan ho ga.e

ḳhabar tujh ko bad-e-saba kuchh nahin

ye hangama-e-alam-e-ab-o-gil

ba-juz ek shor-e-fana kuchh nahin

vahi hijr hai aur vahi vasl hai

mira tajraba bhi naya kuchh nahin

tavalat miri guftugu men jo thi

mire paas kahne ko tha kuchh nahin

‘farasat’ vahi be-hisi hai yahan

tire girye se to hua kuchh nahin