Akhtar Shirani
tamannaon ko zinda arzuon ko javan kar luun
ye sharmili nazar kah de to kuchh gustakhiyan kar luun
bahar aai hai bulbul dard-e-dil kahti hai phulon se
kaho to main bhi apna dard-e-dil tum se bayan kar luun
hazaron shokh arman le rahe hain chutkiyan dil men
haya un ki ijazat de to kuchh bebakiyan kar luun
koi surat to ho duniya-e-fani men bahalne ki
thahar ja ai javani matam-e-umr-e-ravan kar luun
chaman men hain baham parvana o shama o gul o bulbul
ijazat ho to main bhi hal-e-dil apna bayan kar luun
kise malum kab kis vaqt kis par gir pade bijli
abhi se main chaman men chal kar abad ashiyan kar luun
bar aaen hasraten kya kya agar maut itni fursat de
ki ik baar aur zinda sheva-e-ishq-e-javan kar luun
mujhe donon jahan men ek vo mil jaaen gar ‘akhtar’
to apni hasraton ko be-niyaz-e-do-jahan kar luun
Leave a Reply