un ras bhari ankhon men haya khel rahi hai
do zahr ke pyalon pe qaza khel rahi hai
hain nargis-o-gul kis liye mashur-e-tamasha
gulshan men koi shokh ada khel rahi hai
us bazm men jaaen to ye kahti hain adaen
kyuun aae ho, kya sar pe qaza khel rahi hai
us chashm-e-siyah mast pe gesu hain pareshan
maikhane pe ghanghor ghata khel rahi hai
bad-masti men tum ne unhen kya kah diya ‘akhtar’
kyuun shokh-nigahon men haya khel rahi hai
Leave a Reply