tanha.i ka gham ruuh ke andar se nikalun
avaz koi de to qadam ghar se nikalun
duniya use pujegi ba-sad husn-e-aqidat
main apni shabahat ko jo patthar se nikalun
kho ja.un kahin tira-ḳhalaon men to kya ho
ḳhud ko jo tire dard ke mehvar se nikalun
jo dost nazar aate hain ban ja.enge dushman
kya munh se na sach baat bhi is Dar se nikalun
hassas ho duniya to jo nashtar se hai maḳhsus
vo kaam bhi main barg-e-gul-e-tar se nikalun
dushvar sahi phir bhi koi sulh ka pahlu
halat ke bigḌe hue tevar se nikalun
sadiyon se lagi pyaas ko ‘mahir’ jo bujha de
vo jur.a-e-zahrab samundar se nikalun
Leave a Reply