Sufi
ghar se nikalna jab miri taqdir ho gaya
ik shakhs mere paanv ki zanjir ho gaya
ik harf mere naam se divar-e-shahr par
ye kya hua ki raat men tahrir ho gaya
main us ko dekhta hi raha us men duub kar
vo tha ki mere samne tasvir ho gaya
vo khvab jis pe tira-shabi ka guman tha
vo khvab aftab ki taabir ho gaya
main to zaban pe laaya nahin tera naam bhi
kyuun ishq mera bais-e-tash.hir ho gaya
‘aghaz’ us ne jo bhi kaha mere vaste
vo kyuun mire kalam ki tafsir ho gaya
Leave a Reply