vo a.enge to khilenge nashat-e-vasl ke phuul
shab-e-firaq men un ki saḳhavaton ko na bhuul
yahi hai kya tiri taqsim-e-gulsitan ka usuul
kisi ko phuul milen aur kisi ko ḳhaar babul
zamin ka rang to ham-rang-e-dam hota hai
bhaTak na jaa.en kahin meri chahaton ke rasul
tumhare paas to sim-sim ka ism-e-azam hai
ye kya ki band hai apne liye hi bab-e-qubul
kisi ka dida-e-ḳhunin bhi rang la na saka
kisi ke shola-e-tan se pighal ga.e hain usuul
bujha.en pyaar mohabbat ke shabnamistan se
na baiTh jaa.e gul-e-jan pe nafraton ki ye dhuul
bhari bahar men jaise phuvar paḌti hai
kuchh is tarah mire dil par hai sha.iri ka nuzul
ulajh ga.e kabhi sangin haqiqaton se ‘jamil’
kabhi kisi ke tasavvur se ho ga.e hain malul
Leave a Reply