raqsan hai munDer par kabutar
divar si gir rahi hai dil par
Tahni pe ḳhamosh ik parinda
maazi ke ulaT raha hai daftar
uḌte hain hava ki samt zarre
yadon ke chale hain lav-lashkar
peḌon ke ghane muhib saa.e
ye kaun hai mujh pe hamla-avar
patton men jhapak rahi hain ankhen
shaḳhon men chamak rahe hain ḳhanjar
ye kaun qarib aa raha hai
ḳhud mere hi naqsh-e-pa pe chal kar
ye kaun sama raha hai mujh men
baiTha hua chup miri barabar
ye kis ka tanaffus-e-pur-asrar
ye kis ka tabassum fusun-gar
ik karb sa ruuh par hai taari
ik kaif sa chha raha hai dil par
Leave a Reply