Zakhmon Se Kahan Lafzon Se Mari Gai Hun Main

zakhmon se kahan lafzon se maari gai huun main

jivan ke chaak se yuun utari gai huun main

mujh ko mire vajud men bas tu hi tu mila

aise tiri mahak se sanvari gai huun main

afsos mujh ko us ne utara hai gor men

jis ke liye falak se utari gai huun main

mujh ko kiya hai khaak to phir khaak bhi uda

ai ishq teri raah men vaari gai huun main

lo aa gai huun hijr men marne ke vaste

itne khulus se jo pukari gai huun main

meri sadaqaton pe tumhen kyuun nahin yaqin

sau baar aag se bhi guzari gai huun main

tum jante nahin ho aziyyat ke kaif ko

hijrat ke karb se to guzari gai huun main

main mit chuki huun aur numayan hua hai tu

murshid khumar men yuun khumari gai huun main

is vajd men vajud kahan hai mira vajud

jaane kahan pe saari ki saari gai huun main

maqtal men jaan dena thi pyaron ke vaste

main hi thi un ko jaan se pyari gai huun main

ye qarz-e-ishq main ne chukana tha is liye

‘shahin’ apni jaan se vaari gai huun main

Leave a Comment