Ajit Singh Badal
un ke adna ghulam ho kar bhi
ham rahe ḳhaas aam ho kar bhi
bevafai na ki samundar se
mauj ne be-lagam ho kar bhi
dil ki duniya na kar sake raushan
aap mah-e-tamam ho kar bhi
kaise ravan ka kaam kar baiThe
naam ke aap raam ho kar bhi
ham nahin tere pyaar ke laaeq
qabil-e-ehtiram ho kar bhi
pyaar karne ki bhuul kar baiTha
shaḳhs vo nek naam ho kar bhi
pyasi pyasi hi rah gai ‘badal’
zindagi nazr-e-jam ho kar bhi
Leave a Reply