ho ja.enge jis roz sabhi kaam mukammal
aa ja.ega is ruuh ko aram mukammal
dil men hai magar us se kabhi kah nahin paa.e
aane se tire hoti hai ye shaam mukammal
baton men maharat jise hasil nahin hoti
aksar vahi ho jaata hai nakam mukammal
kuchh kaam to ho jaate hain is ḳhauf se aksar
ho jaa.en na ham bhi kahin gumnam mukammal
aa jaata bulane se yaqin mujh ko hai lekin
us tak kabhi pahunche nahin paigham mukammal
ye ziist miri ziist hi rahti bhi kahan phir
ruk jaati agar gardish-e-ayyam mukammal
Leave a Reply