Mujhko Teri Chahat Zinda Rakhti Hai

mujh ko terī chāhat zinda rakhtī hai

aur tujhe ye hālat zinda rakhtī hai

Dho Dho kar har roz jise thak jaatā huuñ

us sāmāñ kī sañgat zinda rakhtī hai

sūraj ne tezāb hai chhiḌkā shāḳhoñ par

gulshan ko kyā rañgat zinda rakhtī hai

chaḌhte sūraj kī maiñ puujā kartā huuñ

yaar yahī ik ḳhaslat zinda rakhtī hai

chuum ke hāthoñ kī rekhā.eñ sotā huuñ

ḳhvāboñ kī ye daulat zinda rakhtī hai

pal-do-pal āñgan meñ tere rahtā huuñ

ek yahī to fursat zinda rakhtī hai

Leave a Comment