mujh ko teri chahat zinda rakhti hai
aur tujhe ye halat zinda rakhti hai
Dho Dho kar har roz jise thak jaata huun
us saman ki sangat zinda rakhti hai
suraj ne tezab hai chhiḌka shaḳhon par
gulshan ko kya rangat zinda rakhti hai
chaḌhte suraj ki main puuja karta huun
yaar yahi ik ḳhaslat zinda rakhti hai
chuum ke hathon ki rekha.en sota huun
ḳhvabon ki ye daulat zinda rakhti hai
pal-do-pal angan men tere rahta huun
ek yahi to fursat zinda rakhti hai
Leave a Reply