yaan us gali sa kab koi bustan hai dusra
haan kuchh jo hai to rauza-e-rizvan hai dusra
har dam ye do adu hain pa.e-jan-e-na-tavan
ik dard-e-ishq hai gham-e-hijran hai dusra
hai turfa jan-o-dil ka dam-e-iztirab haal
roken jo ek ko to gurezan hai dusra
a.ina jab vo dekhe to kahti hain chitvanen
sach hai ki ham sa kab koi insan hai dusra
vo ruk ke uTh chala to use kyunki rokiye
ik dast hai ba-dil ba-gareban hai dusra
us ghar ke dar pe jab hue ham ḳhaak tab khula
darvaza aane jaane ko aur yaan hai dusra
kya dil jigar ki us ki gali men kahen ḳhabar
ik mar gaya ik aan ka mehman hai dusra
rahiye hamare dil men ki laa.eq tumhare kab
aisa makan ba-kishvar-e-dauran hai dusra
Tuk suniyo zamzame mire dil ke ki baagh men
kab is tarah ka murgh-e-ḳhush-alhan hai dusra
hai turfa qismat apni ki jis ja ho ek dost
vaan dekhiye to jaan ka ḳhvahan hai dusra
ya.ani nashist Thahri kal us dar pe thi so haa.e
dekha jo aaj ja ke to darban hai dusra
yakta hai do jahan men ‘jur.at’ ali ki zaat
aisa na koi yaan na koi vaan hai dusra
Leave a Reply