Hasrat Mohani
barkaten sab hain ayaan daulat-e-ruhani ki
vaah kya baat hai us chehra-e-nurani ki
shauq dekhe tujhe kis aankh se ai mehr-e-jamal
kuchh nihayat hi nahin teri darakhshani ki
mujh se vo sag bhi hai afzal jise izzat ho nasib
astan-e-haram-e-yar pe darbani ki
jab suna yaad kiya karte ho tum bhi to mujhe
kya kahun had na rahi kuchh miri hairani ki
sai-e-ahbab ko nahaq hai rihai ka khayal
aur hi kuchh hai tamanna tire zindani ki
vo tabassum bhi qayamat hai tira bad-e-jafa
tu ne di ho jise khidmat namak-afshani ki
mushkilon se jo muqabil hui himmat meri
qadr baaqi na rahi aish-e-tan-asani ki
rah gaya jal ke tiri bazm men parvana jo raat
khinch gai shakl miri sokhta-samani ki
rashk-e-shahi ho na kyuun apni faqiri ‘hasrat’
kab se karte hain ghulami shah-e-jilani ki
Leave a Reply