Aziz Hamid Madni
is guftugu se yuun to koi mudda.a nahin
dil ke siva harif koi dusra nahin
anhken taras ga.iin tumhen dekhe hue magar
ghar qabil-e-ziyafat-e-mehman raha nahin
naqus koi bahr ki tah men hai na.ara-zan
sahil ki ye sada to koi naḳhuda nahin
maana ki zindagi men hai zid ka bhi ek maqam
tum aadmi ho baat to sun lo ḳhuda nahin
lutf-e-suḳhan yahi tha ki ḳhud tum bhi kuchh kaho
ye vahm hai ki ab koi gosh-e-vafa nahin
meri vafa bara.e vafa ittifaq thi
mere siva kisi pe ye afsun chala nahin
us ki nazar taghayyur-e-halat par ga.i
koi mizaj-dan-e-mohabbat mila nahin
Leave a Reply