Manzar Lakhnavi
phal jaa.e mohabbat to mohabbat hai mohabbat
aur raas na aa.e to musibat hai mohabbat
sarmaya-e-divana-e-ulfat hai mohabbat
ai ulTe hue dil tiri qimat hai mohabbat
hai ham hi talak ḳhair ghanimat hai mohabbat
ho jaa.e unhen bhi to qayamat hai mohabbat
ro ro ke vo pochhenge miri aankh se aansu
a.enge vo din bhi jo salamat hai mohabbat
badnam kiya laakh tujhe ḳhud-gharazon ne
phir bhi tiri duniya ko zarurat hai mohabbat
duniya kahe kuchh hai magar iman ki ye baat
hone ki tarah ho to ibadat hai mohabbat
hai jin se un ankhon ki qasam khata huun ‘manzar’
mere liye parvana-e-jannat hai mohabbat
Leave a Reply