Tumhaare Nam Par Maine Har Aafat Sar Pe Rakkhi Thi

Rahat Indori

tumhare naam par main ne har aafat sar pe rakkhi thi

nazar sho.alon pe rakkhi thi zaban patthar pe rakkhi thi

hamare ḳhvab to shahron ki saḌkon par bhaTakte the

tumhari yaad thi jo raat bhar bistar pe rakkhi thi

main apna azm le kar manzilon ki samt nikla tha

mashaqqat haath pe rakkhi thi qismat ghar pe rakkhi thi

inhin sanson ke chakkar ne hamen vo din dikha.e the

hamare paanv ki miTTi hamare sar pe rakkhi thi

sahar tak tum jo aa jaate to manzar dekh sakte the

diye palkon pe rakkhe the shikan bistar pe rakkhi thi