kuchh is tarah se vo mere nazdik aa raha tha
diye ki lau bujh rahi thi main jalta ja raha tha
vo ruk gaya jab sabaq ka unvan-e-ishq aaya
jo zindagi ka nisab mujh ko paḌha raha tha
main ab ke andar se kar raha tha badan ko chhalni
so bas tasavvur men us ka matam mana raha tha
phir ek din ḳhuun ban ke ankhon se chiḳh nikli
main apni avaz jaane kab se daba raha tha
main apni ankhon se sun raha tha vo ik kahani
vo ik kahani jo us ka chehra suna raha tha
main apne chehron se ḳhud bhi hairan sa huun ‘tariq’
vo mere andar se itne parde uTha raha tha
Leave a Reply