Mahtab Haider Naqvi
zindagi kya hai ba-juz vahm-o-guman mere liye
ye zamin jab ho ga.i be-asman mere liye
vo badan sahra baḌha deta hai pahle meri pyaas
aur ban jaata hai phir ab-e-ravan mere liye
mausam-e-dil ne bikhere dil ke bahar apne rang
rang-e-gul us ke liye rang-e-ḳhizan mere liye
shahr men lagti hai phir ik roz bujh jaati hai aag
chhoḌ jaati hai magar saara dhuan mere liye
us se milne ka saman us se juda.i ki ghaḌi
aur phir kuchh bhi nahin sud-o-ziyan mere liye
asman-e-dil pe raushan lafz-o-ma.ani ki tarah
hai zamin-e-sher ki ye kahkashan mere liye
Leave a Reply