Bedam Shah Warsi

Mujhe Jalwon Ki Uske Tamiz Ho Kya Mere Hosh-O-Hawas Baja Hi Nahin

mujhe jalvon ki us ke tamiz ho kya mere hosh-o-havas baja hi nahin

hai ye be-khabari ki khabar hi nahin vo naqab utha ki utha hi nahin

mire haal pe chhod tabib mujhe ki azaab hai miri ziist mujhe

mera marna hi mere liye hai shifa mere dard ki koi dava hi nahin

use DhunDte DhunDte kho gae ham ye hua kya aur kya ho gae ham

hamen pahron tak apni khabar hi nahin hamen koson tak apna pata hi nahin

mira haal kharab suna to kaha ki vo samne mere na aae kabhi

mujhe rote jo dekha to hans ke kaha ki ye sheva-e-ahl-e-vafa hi nahin

jahan koi sitam ijad kiya mujhe kah ke falak ne ye yaad kiya

ki bas ek dil-e-‘bedam’ ke siva koi qabil-e-mashq-e-jafa hi nahin

More Poems

Leave a Comment