apne kahte hain koi baat to dukh hota hai
hans ke karte hain isharat to dukh hota hai
jin se mansub mire dil ki har ik dhaḌkan ho
vo na samjhen mire jazbat to dukh hota hai
mujh ko mahrum kiya tum ne gila koi nahin
hon jo ghairon pe inayat to dukh hota hai
jism-o-jan jin ke liye ham ne luTa Daale huun
chhoḌ jaa.en jo vahi saath to dukh hota hai
duur se roz-e-masarrat ka dikha kar badal
gham ki karte hain jo barsat to dukh hota hai
hijr men din to kisi taur guzar jaate hain
jalne lagti hai kabhi raat to dukh hota hai
be-sabab chhoḌ diya us ne koi baat nahin
log karte hain savalat to dukh hota hai
mujh ko be-laus mohabbat ke evaz men ‘shamsi’
ho ata zaḳhm ki saughat to dukh hota hai
Leave a Reply