vasl ki raat vo tanha hoga
us pe halat ka pahra hoga
niind kyuun TuuT ga.i aḳhir-e-shab
kaun mere liye taḌpa hoga
ḳhushbuen phuuT ke roi hongi
gul havaon men jo bikhra hoga
vadi-e-zehn se uThta hai dhuan
qafila yadon ka Thahra hoga
jaane kis haal se guzri hogi
phuul jis shaḳh pe utra hoga
yaad a.engi hamari ghazlen
zikr jab taaza hava ka hoga
chand ko dekh ke chhat par ‘anjum’
saaya divar se nikla hoga
Leave a Reply