Wasl Ki Raat Wo Tanha Hoga

vasl kī raat vo tanhā hogā

us pe hālāt kā pahra hogā

niiñd kyuuñ TuuT ga.ī āḳhir-e-shab

kaun mere liye taḌpā hogā

ḳhushbueñ phuuT ke roī hoñgī

gul havāoñ meñ jo bikhrā hogā

vādī-e-zehn se uThtā hai dhuāñ

qāfila yādoñ kā Thahrā hogā

jaane kis haal se guzrī hogī

phuul jis shāḳh pe utrā hogā

yaad ā.eñgī hamārī ġhazleñ

zikr jab taaza havā kā hogā

chāñd ko dekh ke chhat par ‘anjum’

saaya dīvār se niklā hogā

Leave a Comment