ik baar mil ke phir na kabhi umr bhar mile
do ajnabi the ham jo sar-e-rah-guzar mile
kuchh manzilon ke ḳhvab the kuchh raston ke dhuul
nikle safar pe ham to yahi ham-safar mile
yuun apni sarsari si mulaqat ḳhud se thi
jaise kisi se koi sar-e-rah-guzar mile
ik shaḳhs kho gaya hai jo raste ki bhiiḌ men
is ka pata chale to kuchh apni ḳhabar mile
apne safar men yuun to akela huun main magar
saaya sa ek raah ke har moḌ par mile
barson men ghar ham aa.e to begana-var aaj
ham se ḳhud apne ghar ke hi divar-o-dar mile
‘maḳhmur’ ham bhi raqs karen mauj-e-gul ke saath
khul kar jo ham se mausam-e-divana-gar mile
Leave a Reply