abdul-ahad-saaz

Manzar Shamshan Ho Gaya Hai

manzar shamshan ho gaya hai

dil qabristan ho gaya hai

ik saans ke baad dusri saans

jiina bhugtan ho gaya hai

chhu aae hain ham yaqin ki sarhad

jis vaqt guman ho gaya hai

sargoshiyon ki dhamak hai har-su

ghul kanon-kan ho gaya hai

vo lamha huun main ki ik zamana

mere dauran ho gaya hai

sau nok-palak palak-jhapak men

uqda asan ho gaya hai

manzil vo kham-e-safar hai jis par

chori saman ho gaya hai

ik marhala-e-kashakash-e-fan

vaj.h-e-imkan ho gaya hai

kaghaz pe qalam zara jo phisla

iz.har-e-bayan ho gaya hai

paida hote hi aadmi ko

lahaq nisyan ho gaya hai

piili ankhon men zard sapne

shab ko yarqan ho gaya hai

saude men ghazal ke faeda ‘saz’

kaisa nuqsan ho gaya hai

More Poems

Leave a Comment