kya gharaz laakh khudai men hon daulat vaale
un ka banda huun jo bande hain mohabbat vaale
chahen gar chara jarahat ka mohabbat vaale
bechen almas o namak sang-e-jarahat vaale
gae jannat men agar soz-e-mohabbat vaale
to ye jaano rahe dozakh hi men jannat vaale
saqiya hon jo subuhi ki na aadat vaale
subh-e-mahshar ko bhi utthen na tire matvale
dukhtar-e-raz ko nahin chhedte hain matvale
hazar us fahisha se karte hain hurmat vaale
rahe juun shisha-e-saat vo mukaddar donon
kabhi mil bhi gae do dil jo kudurat vaale
kis maraz ki hain dava ye lab-e-jan-bakhsh tire
jan-ba-lab hain tire azar-e-mohabbat vaale
hirs ke phailte hain paanv ba-qadr-e-usat
tang hi rahte hain duniya men faraghat vaale
haae re hasrat-e-didar miri haae ko bhi
likhte hain ha-e-do-chashmi se kitabat vaale
nahin juz shama mujavir miri balin-e-mazar
nahin juz kasrat-e-parvana ziyarat vaale
na shikayat hai karam ki na sitam ki khvahish
dekh to ham bhi hain kya sabr o qanaat vaale
kya tamasha hai ki misl-e-mah-e-nau apna farogh
jante apni hiqarat ko hain shohrat vaale
dil se kuchh kahta huun main mujh se hai kuchh kahta dil
donon ik haal men hain ranj o musibat vaale
tu gar aa jaae to ai dard-e-mohabbat ki dava
mire hamdard hon bedard fazihat vaale
chhod dete hain qalam juun qalam-e-atish-baz
miri sharh-e-tapish-e-dil ki kitabat vaale
kabhi afsos hai aata kabhi rona aata
dil-e-bimar ke hain do hi ayadat vaale
tu mire haal se ghafil hai par ai ghaflat-kesh
tere andaz-e-taghaful nahin ghaflat vaale
ham ne dekha hai jo us but men nahin kah sakte
ki mubada kahin sun paaen shariat vaale
naaz hai gul ko nazakat pe chaman men ai ‘zauq’
us ne dekhe hi nahin naz-o-nazakat vaale
Leave a Reply