faisla mumkin hai yuun munsif agar aadil na ho
qatl to hote rahen sabit koi qatil na ho
mushkilen asan na hon meri to mujh ko gham nahin
par jo hai asan kam az kam vo to ab mushkil na ho
dafn hain daftar ki file men hazaron mas.ale
aisa lagta hai ki jaise qabr ho file na ho
ḳhatm hone ko safar hai saath chhuTa jaa.e hai
chahta hai dil mira manzil abhi hasil na ho
ishq hai aisa safar jis ki koi manzil nahin
ya.ani ik kashti ki jis ke vaste sahil na ho
Leave a Reply