Mansoora Ahmad
koi avaz deta hai
harir-o-parniyan jaisi sadaon men
koi mujh ko bulata hai
kuchh aisa lams hai avaz ka jaise
achanak fakhta ke dher se komal paron par haath pad jaae
aur un men dubta jaae
bahut hi duur se aati sada hai
main lafzon ke maani ki gavahi de nahin sakti
magar har lafz men ghungru bandhe hain
harim-e-jan men un ke paanv dharte hi
kai bechain pazeben dhadakti hain
lamhon men ek divali si sajti hai
koi avaz deta hai
harir-o-parniyan jaisi sadaon men
koi mujh ko bulata hai
Leave a Reply